【G遊記】地鐵自助 – 超suprise之孔雀散步、松鼠捉迷藏南怡島遊

香港嘅生活，有無令你喘不過氣？

起適當時間去一趟旅行，對我嚟講真係好重要，唔單止心靈滿足，亦都好好為身心reset，消除所有負能量。

小G比較貪心，6月去首爾除咗食同Shopping之外，都想抽一日呼吸大自然空氣，Refresh一下，所以我就加咗一日重點行程 — 南怡島。原本我唔係一個K-POP之人，去之前唔認識呢個地方，亦唔知道韓劇「冬季戀歌」起呢度取景拍攝。但某日見到友人Facebook嘅一張南怡島風景相，就比佢吸引住，好想好想去啦！

友人張南怡島吸引我嘅原因，就係島上綠油油之餘仲有紅、黃、橙、啡樹葉，加上藍天，成個構圖真係好吸引！

決定咗去南怡島，最重要就係搵交通方法：


公車
 東首爾客運站(每15分鐘發車, 車資 5,600韓元), 上鳳客運站(每30分鐘發車, 車資5,100韓元)搭乘開往春川的巴士，在加平客運站下車(約需1小時20分鐘)，再搭乘計程車或市內公車前往加平渡船口(約需10分鐘)


火車
 在清涼里站搭乘開往春川方向的火車在加平站下車(1天20班次運行, 車資 3,800韓元)約需1小時20分鐘→ 再搭乘計程車或市內公車前往加平渡船口(約需10分鐘)


接駁車
 在仁寺洞的塔谷公園搭乘開往加平渡船口的直達接駁車，約需1小時40分鐘(首爾出發9:30, 車資7,500韓元)
 預約諮詢：+82-2-753-1245(韓日)

資料轉自http://big5chinese.visitkorea.or.kr/cht/index.kto

思前想後，以下係2個我比較可行的方法

1.由仁寺洞坐遊覽專車

2.地鐵

由於仁寺洞遊覽專車每日早上得一班，如果MISS左就煩，另外即日買票可能會無票，所以我就決定用時間可以自己話事嘅方法 — 地鐵。

我由弘大出發，路程約2小時，詳情如下圖:

去到上鳳就要轉京春線去加平

坐地鐵去到加平之後就要坐的士(車費約W3000/HK$25)，上車同司機講Nami，佢地就會明白，車程約10mins。

落車之後，就先要去買門票，記得買外國人門票(成人W8000/HK$62)，門票係包括來回船及入場。

船程約5mins，吹下海風，好快就到啦!

比大家睇下我影嘅相先，希望你都鍾意南怡島嘅風景。

南怡島有好多雪人icon
 

 

香港&南韓

最愛呢條路，四季風景都唔同
 

 

夏天都有紅葉，真係好靚

 

 bear bear在啤你
 

南怡島雖然唔係好大，但係我玩得好開心，成個行程真係好難忘同surprise!

因為…… 我遇到了牠和牠！


就係同我散步嘅孔雀、同我玩捉迷藏嘅松鼠，我諗呢世人真係無咩呢d機會，真係好開心又興奮呀!

 

我行左佢行右、我行右佢行左、超過癮

 

 

 

 

如果你怕小動物….. 咁……. 就真係幫你唔到，因為郊野有「大」蜜蜂、蚊、蟲、蟻、蝴蝶….. 真係好正常！佢地係屬於大自然架嘛，只不過係比我地呢D人類打搞到咋。

去南怡島遊樂，你需要放心城市人心態，放慢腳步，盡情享受呢一片美好土地。

南怡島有咩玩? 如果你鍾意踏單車同野餐就岩啦！島上有單車租，咁就唔怕行到腳痛啦，好適合拍拖同一家大細去玩。

唔想野餐？島上面有幾間餐廳，比大家自在咁休息下，我就去左南門食韓國料理

 

素菜拌飯

 

 嫩雞飯

整體味道唔錯，嫩雞真係好滑，餐廳都坐得好舒服

回程在船上睇日落

 南怡島四季風景各有吸引一面，好希望有機會再去南怡島，親身感受!

大家不妨抽時間去玩呀，除咗shoppin之外，我反而鍾意欣賞大自然，因為你永遠唔知道自己會遇到咩，就好似我一樣，拍到同孔雀散步、同松鼠玩捉迷藏嘅片，真係好suprise、呢一d物質絕對比唔上！

希望大家同我一樣，可以起呢度遇見你嘅驚喜啦！

喜歡小G嘛? 請到個人Facebook 給我一個like啦 :) 謝謝！
 Lazy G.Lazy Place ( <— Click )

【G遊記】一個地下街掃走十幾件衫？必掃永登蒲HK$45上下身韓衫!

上次去完首爾明洞Star101 (按我重溫)，仍然覺得未夠喉，於是同友人一齊去永登浦地下街尋寶，一個個W3000(HK$23)嘅牌仔真係令人好興奮，當然值得花時間去拼過啦！

 

 

呢度就係我5日戰利品

最貴都係w24900(HK$190)

 

 

永登浦地下街

除咗價錢吸引，呢度有個好處就係比較少遊客，同埋唔會太迫，你可以好自在咁行。(我當日去係平日下午)，除咗衫之外，仲有一間開24小時嘅超市E mart，岩哂買嘢精，萬一想再買手信，呢度就可以比大家補給機會啦。

由於行永登浦當日就要返香港，我只係預留咗1.5小時去尋寶，時間有限就要用「速字訣」，見到style岩就入去、見到門口有W3000特價牌仔必入，於是短短1.5小時就掃走十幾件衫，當中仲有部份係w3000(HK$23)、w5000(HK$38)、w8000(HK$62)、w10000(HK$77)嘅上、下身，最平買齊一套都只係HK$45、最貴買齊一套都不過HK$160，抵哩！

 

 

呢間就係我搵到w3000(HK$23)嘅店，我買左一條花花裙同一件橫間Tee

 

 

其中幾件起永登浦地下街買嘅戰利品

左上: 閃鑽黑Tee w5000(HK$38)

右上：直間背心w10000(HK$77)

下：花花裙w3000(HK$23)

仲要係made in korea 架！

 

 

首爾好多w10000的手袋店

而呢個手袋係起仁寺洞買w10000(HK$77)

大家去呢度掃貨記得帶環保袋呀，雖然佢地都會有膠袋，但拎少D膠袋，環保一D嘛 J

 

Where to: 首爾地鐵1號線永登浦站(139) EXIT 5

 

 

 

 

理性戰勝物慾 行理箱只係18.5kg 咋~ haha~ 好彩好彩!

 

 

喜歡小G嘛? 請到個人Facebook 給我一個like啦 :) 謝謝！
Lazy G.Lazy Place ( <--- Click )

 

【G遊記】女生Shopping必去- 明洞HK$90掃齊上下身 韓Look無難度！

考下大家，去首爾買平衫，邊度好呢？東大門？Out 啦！

而家去明洞就有超平嘅掃貨好去處，上個月行明洞，無意發現位於地牢嘅Star101，先唔講有幾精彩，講下點解我會放棄東大門先。

 東大門近年d野愈來愈貴，而且想買平衫，就要10pm之後先開始。加上如果只打算每間買一,二件，好多店都唔願賣比你，想成功以至抵價買衫? 起東大門麻煩你收起旅行look，相機no! 手上最好有本薄、有計數機，要扮成真係入貨咁，如果佢地問:「shopping?」 你就要答：「no, for business」….. 太多規舉啦！而且，去旅行玩足一日已經無咩精力，再要夜行血拼，我諗未開始已經累死~! 哈！

而且，女仔要留意一點，夜晚東大門好多假的士，如果你無為意，好易比人呃車費，為咗避開呢個問題，所以我決定，放棄夜行東大門，留多d精力日間遊走。

 

 

好啦，講返明洞Star101，佢隱身起一條橫街，門口放咗一排排w5900(即約HK$45)嘅衫架，唔難發現。再行入去就有長長樓梯到地牢，一入去，真係嘩一聲，好大好多元化，無論男裝、女裝、飾物、配件，都可以搵到。除咗門口一排排w5900嘅特價衫，近樓梯位置都係樓梯一排排w5900嘅衫。當然仲有正價產品啦，總括產品唔貴，而且都係Made in Korea，d 料唔錯呀！

 

 

門口一排排w5900嘅特價衫

 

地方好大，男女裝都有，女仔唔買悶親另一半啦。

 而我呢個韓Look，上下身就係起Star101買，分別特價各w5900，一共HK$90就包辦到！係唔係好爽呢，買多幾件都唔怕肉痛。

 

 

 

想Shopping又唔想去人多又較雜、又怕夜行東大門嘅你，明洞都係一個good choice，至少我同朋友行到10:30pm，個度仲係好旺，又唔洗擔心無metro返酒店嘛。

 

Girls~ 認住呢粒星去尋寶啦！

 

 

 

得一間Shop咁少? 唔夠喉？

下一次為大家介紹超好買地下街，W6000(HK$45)就可以掃齊上下身 韓Look! 你無睇錯，係W6000咋~ 記得留意Lazy G.Lazy Page啦~

 

 

預告：一個地下街掃走十幾件衫？

 

star101 (Myeongdong 2 shop)

地址: B1 Myeongdong B/D, 21, Myeongdong 6-gil, Jung-gu, Seoul, Korea
電話: 82-2-3789-1090

喜歡小G嘛? 請到個人Facebook 給我一個like啦 :)
謝謝！Lazy G.Lazy Place ( < --- Click )

【出外旅遊靠上網?!】超方便 - 南韓7日上網卡分享

而家科技愈來愈發達，以前出外旅遊要手拎一本本重到死嘅旅遊書同地圖，而家？上個網就搞掂，GET LOST? 打個開GPS就無問題，所以上網真係對旅者好重要架！

上個月去韓國，我就帶咗「南韓7日上卡」去首爾，整體使用都好方便。有朋友問我「點解唔去韓國租wifi蛋」、「點解唔起香港租wifi蛋」? 原因:「慳時間」。

 
 

 

點解咁講？

起韓國租wifi蛋起回程時需要少少時間排隊去還機，但如果又要退稅又要還機，真係要早3小時去機場，我就唔想啦。

 

唔起香港租wifi蛋需要按金，某服務公司就要按金$1000，同埋要回港翌日還機，計過時間上唔方便自己，加上個蛋好大又重，聽講某d服務商嘅蛋好快無電，又另外需要租個外置電機，咁咪重上加重？本身自己去旅行已經好多3C 產品拎，我又唔吾想啦。

雖然去首爾好多地方都有WIFI，但自己手機有呢個服務，感覺安心D。所以，研究完一輪，我就上網買咗中國聯通「南韓7日上卡」，當時Online shop 有優惠，折後$199。我同朋友一共買2張，仲送咗一張「漫遊王」電話卡，方便打長途返香港。(但唔知而家仲有無得送呢?)

張卡要點用呢？

 

 

張卡係Micro sim，如果你想要nano sim、買卡時就要講埋，咁佢地就會同你cut細佢。

 

跟住佢d steps，出發7日前要上網登記加upload埋passport，咁就ok啦！

我之前出發前2日登記，等咗成日都收唔到佢email reply，本來以為登記唔到，

好彩之後聯絡到佢地CS，佢地好快就回覆登記成功。所以建議大家都係出發前3,4日登記，如果等耐咗仲未有confirm email，都仲有時間搵佢地幫手嘛!但又唔好早過7日wo，如果唔係佢提早扣你時間，咁就唔抵啦!

 

PS: 而家又有另一間公司出咗相同嘅卡，仲要唔洗登記，仲方便D。

 

跟住佢d steps登記，最好起辦公時間，佢地會處理得快d。

 

 

張卡接收好嘛?

我去首爾嘅位置係 弘大、梨大、東大門、明洞 、南怡島等大熱地方，期間我用note 2，信號好好，上FB、睇新聞短片、打機都無斷無窒，即使去郊區南怡島都無呢個問題。

雖然有朋友話佢用呢張卡出現問題，覺得好慢，但我真係唔覺得，同埋張卡可以SHARE WIFI，都OK丫! 1張卡可以2個人用，$199點都抵過WIFI蛋丫，同埋佢最大好處係，唔洗拎重重的蛋、又吾洗擔心無電，只係換卡就OK啦! 一到步RESTART個機，咁就可以上網啦! 岩我，超方便。

 

 

但！有件事要留意! 用呢張卡的話，如果你手機係用HTC，咁….  你地無緣了，因為SETTING問題，張卡只係FIT到SAMSUNG,IPHONE,IPAD，我朋友就係用HTC，但點SET都係用唔到張卡，原來上網好多人都係有呢個情況，可惡係佢地ONLINE SHOP無提到呢點。

 

整體呢張卡係好方便，但如果出多張5日卡，收費又平D咁就好啦。

 

如果旅行仲要做低頭族，咁呢趙旅程只會錯失更多！所以我都係必要時篤篤下，或者開一D 地鐵APP先用。

最怕出去玩，仲要死掛住個電話，一有Message即變緊張，就好似忘記咗同行者嘅存在， 而我，盡量都係大家坐低休息時先進行「個人的快樂上網時間」，旅行都係要放鬆自己啫 ，適當「手機先食」嘅Share就夠啦~

 

 

 

 

 

喜歡小G嘛? 請到個人Facebook 給我一個like啦 :)
謝謝！Lazy G.Lazy Place ( < --- Click )

【G遊記】窮遊首爾試住$300晚弘大民宿

上次貼咗5天首爾+南怡島行程之後，燒起咗好多朋友去首爾嘅心，個個都話要秋天跟住我咁坐地鐵去南怡島~ 哈，真係比面，只要花時間做下研究，其實真係唔難，而我都係第一次自己Plan首爾行程，仲無咩甩碌，好大滿足。

 

 每次去旅行，book完機票之後，就開始入手搵住宿啦。講得上窮遊首爾，除咗搶到平機票，住都要經濟又稱心。哈哈，呢個任務，search同考慮都用咗3日，當然係返工時忙裡偷閒、食lunch時搞啦。(扮乖!)

搵完幾間之後，就決定弘大SPACE TORRA，無論起地理、價錢、外觀、整潔上都合乎要求。 按我參考其他弘大住宿

 

點解?

地理  - 弘大站，機鐵直達，50mins就可以起仁川機場去到，唔洗怕塞車。而且好近弘大旺區，食(好多Café,燒烤店)、買(skincare)夜市、玩(trickeyes)、蒲(disco,pub)都好方便。

 

價錢  -  80000won(2人價) 約HK$600, 即1人$300晚，100000won (3人價) 約  HK$770, 即1人$260晚  (呢個係deluxe room,獨立washroom)  如果想再平d，有一d無獨立washroom嘅房，睇下自己需要去選啦。

 

外觀 – 3層house、6間房、有廚房自己整早餐、公眾電腦、公眾TV、比較簡單

 

 

    自己整簡單早餐

  公眾PC

 

 

整潔  –  無Room service、房垃圾要自己執去大廳(要分類) 、washroom好細，企起度沖涼，我住room 5 但要用手拎起花灑，無得插起，有d累。整體都ok(以呢個價，岩唔太高要求，但又唔會話係dirty)

我住ROOM 5 (deluxe room,獨立washroom)

1大1小床，可以3人入住

 

 

房好簡單，但都算大，打開行李箱都仲有好多位行，岩女仔慢慢玩戰利品。

缺點係無Table，放唔到野，只得一小小塊木板起鏡下。

 

 

 

 

 

 

 

 

 

 

 

 

 

 

 

地理上都好方便，睇住地圖都好易搵到。

出弘大站EXIT 2,EXIT 3都可以，EXIT 2旺D，EXIT 3靜D，仲有最重要係EXIT3有電梯，找行李上上落落呢點真係好重要!!

我就行EXIT 3，,約8mins，雖然網上話唔建議晚上行EXIT 3，但我地2個女仔晚上約11pm 行咗幾晚都感覺ok。

 

Exit 3，一直向前行，之後請參考地圖，

 

 

 見到呢個小食店，左手邊就係啦！

 

SPACE TORAA主要用英文溝通，所以大家唔洗擔心。

9,10月有幾日紅假，大家會唔會考慮下去首爾玩呢？

住弘大真係唔錯架，又唔會太多人，岩唒鍾意慢活嘅你呀！

 

SPACE TORRA網址
 

http://www.spacetorra.com/default/info/customer1.php

https://www.facebook.com/#!/spacetorracom

 

喜歡小G嘛? 請到個人Facebook 給我一個like啦 :)
謝謝！Lazy G.Lazy Place ( < --- Click )